اجمل حاجه فى الكون دا قعدة عصارى فى غيط واحد صاحبك _ارض زراعية_ وكباية شاى اخضر وحتة جبنة قديمة وعيش ناشف وبس كفايه علينا كدا مش عايزين حاجه تانيه ,مش هتعوز اى حاجة من الدنيا تانى , رئيس يمسك رئيس يورث رئيس يتشال محمد جال مبارك يمسك كلة زى بعضة مش فارقة .

خلاص انت تعمل احسن حاجه فى الدنيا وياسلام بقى لو فى عوديين قصب يبقى كملت وعمرك ما هتفكر فى " روح شاكيد " ولا فى " شاكيد " نفسة , الا صحيح هو من شاكيد دا .

ماعلينا خلينا فى القعدة التمام اللى احنا فيها ومتعكرش الدنيا , قال ايه بيقولك الاخوان هيعملوا حزب مش تبع الاخوان وينفع يدخل فية مسيحين هو الكلام دا صحيح ؟؟؟ , طب واحنا مالنا .

طب التعديلات الدستورية , يووووه دى القعدة ميه ميه , طب حكايتها , مش هقولك على بقيت الليله ديا , ليه , مزاجى عالى ومش عايزة يوطى والقعدة تمام والدستور عاجبنى وكلة تمام وتحت امرك يا ريس .

والشاى الاخضر مش بيتشرب غير سخن , اشرب يا صاحبى اشرب